Cartel de la charla

El prósimu llunes 20 y martes 21 van celebrase dos charles alrodiu’l tema la crisis. Nesta ocasión van centrase nun plantegamientu de qué rempuestes polítiques y sindicales vamos poder dar a la crisis sistémica actual dende una perspectiva anticapitalista.

Pa ello vamos cuntar cola participación de dellos sindicalistes de distintos sectores y esperiencies que mos van apurrir los sos puntos de vista sobro la crisis y qué creen ellos que ye la rempuesta qu’hai que dar. En primer llugar va participar Cándido González Carnero, que foi sindicalista de la Naval Xixón y que mos puee dar una visión en perspectiva de lo que fueron les lluches del nuesu pasau reciente. Tamién va participar Juan García Alonso, presidente del comité d’empresa de TUA, la empresa de tresporte urbanu d’Uviéu, que vienen de ganar un conflictu llaboral hestóricu na empresa. Finalmente participará Álex García Ferrer, militante d’Izquierda Anticapitalista y sindicalista de McDonalds en Granada que mos va contar la so particular esperiencia no que puee denominase “nueu sindicalismu”, asina como aportanos delles idegues y plantegamientos políticos frente a la crisis.

Les charles van facese’l llunes 20 d’abril a les 19:00 hores nel Palacio de Valdecarzana d’Avilés (C/El Sol s/n) y el martes 21 d’abril a les 19:30 hores nel Ateneo Obrero de Xixón (C/Covadonga 7, 1º Izq.).

Cartel de la charla

Debido a la imposibilidá d’asistencia d’uno de los ponentes la charra programada pal prósimu martes 31 de marzu queda suspendida a la espera d’atopar una fecha meyor en prósimes selmanes.

El prósimu martes 31 de marzu entamamos na Casa Sindical de Xixón una charra que baxo’l titulu de “Crisis, análisis económicu y sindical” va analizar la situación de crisis d’anguañu dende les dos óptiques. De la parte sindical encargaráse Cándido González Carnero, que foi sindicalista de la Naval Xixón y puee danos una visión más averada a la realidá asturiana, asina como un recorríu por esta llarga crisis qu’azota Asturies dende les reconversiones. De la parte económica encargaráse Nacho Álvarez, economista ya investigador de la Universidá Complutense de Madrid y militante d’Izquierda Anticapitalista.

La charla va facese’l mates 31 de marzu a les 19:30 na Casa Sindical de Xixón (C/San Crespo, 13).

Ante el dictamen de la Xunta Electoral Central que limita la recoyía de les 15.000 firmes pa llegalizar candidatures nes elecciones europees

Declaración d’Izquierda Anticapitalista

La Xunta Electoral Central( JEC) ta acabantes d’emitir un dictamen con fecha 20 de xineru nel que decide que les firmes pa llegalizar candidatures pales europees nun se pueen recoyer hasta que se convoquen les elecciones ( el 14 d’abril), que’l plazu pa recoyeles ye de 15 díes (hasta que se pieslle’l plazu de presentación de candidatures), qu’hai qu’autenticales toes elles presentando a les 15.000 persones ante notariu o, en so defectu, llevales xunto cola copia del DNI de tolos firmantes a caun de los Ayuntamientos nos que tean censaos, buscar al Secretariu d’ésti y pidi-y que l’autentifique. Too ello en 15 díes.

Estes condiciones, impuestes además ensin el menor debate públicu, constituyen enormes torgues económiques y organizatives, que carecen de toa xustificación democrática y limiten el pluralismu políticu. Pol contrariu, tratase d’impedir la llibre espresión del sofitu social a la participación electoral d’organizaciones ensin representación parlamentaria. Nun vamos a sometenos a esti trágala, de nenguna manera.

Llei Electoral (LOREG) y el Reglamentu que desendolca’l procedimientu pales elecciones europees  nun señalen en nengún casu que’l plazu de recoyía de les firmes seya de 15 díes nin qu’haiga qu’autenticales ante notariu. La JEC na consulta que-y ficimos n’ochobre, respondiónos diciendo que tol procedimientu taba regulau nel Reglamentu que ya se-y consultara y que los datos que había de rellenar yeren los recoyíos nos pliegos que yá se distribuyeron.

Nada indicaba, por tanto, que la Xunta pudiera poner unes condiciones de plazos y formes d’autentificación de les firmes como les qu’agora ta acabante de dictaminar.

Ante esta situación, Izquierda Anticapitalista declara lo siguiente:

1. Vamos a continuar, con más fuerza tovia, la recoyía de les 15.000 firmes. Como yá aprobamos nel so día, esta ye una perbona iniciativa pa difundir la nuesa candidatura y falar cola xente, tal y como tamos faciendo y comprobando nes caberes selmanes. Al pidir les firmes, vamos afirmar la nuesa intención de presentales ante la JEC y si, como ye previsible, les invaliden, vamos presentar recursu d’amparu ante’l Tribunal Constitucional. Mantenemos el compromisu de que namás vamos presentar la nuesa candidatura si algamamos les 15.000 firmes.

2. En paralelu, vamos buscar tamién les 50 firmae de cargos electos. Nes nueves circunstancies, algamar les firmes de los conceyales ye imprescindible pa asegurar  la llegalización de la nuesa candidatura. En consecuencia, vamos buscar d’equí al 14 d’abril el másimu númberu posible de compromisos de firma de conceyales, que llueu tendrán de ser formalizaos entre’l 14 y 30 d’abril.

3. A les y los firmantes, a les y los miembros de los comités d’apoyu, y a les persones que mos tán sofitando a buscar firmes queremos deci-yos que buscamos les 15.000 firmes como forma de divulgar la nuesa candidatura, verificar l’interés que suscita y la nuesa capacidá pa llegar a la xente y  denunciar los mecanismos llegales qu’intenten impedir el nuesu derechu a presentarnos a les elecciones. Por tanto, consideramos que’l compromisu que fasta agora demostraron les miles de persones que ya mos firmaron y los cientos que tan  implicaos nos comités d’apoyu tien de continuar agora con más fuerza que nunca.

Echáronnos un pulsu y tenemos que ganálu.

24 de marzu de 2009

El pasau 7 de marzu celebróse na Casa Sindical de Xixón un conciertu en sofitu a los recién creaos comités d’apoyu d’IA n’Asturies y pa dar el pistoletazu de salida a la campaña de recoyía de firmes pala candidatura d’IA a les elecciones europees.

Más de 100 persones asistieron y disfrutaron del psicodelic show d’Helios, del punk-rock n’asturianu de Misiva y de la única actuación n’Asturies de la xira de presentación de “Antiimperialista”, l’último trabayu de Fe de Ratas.

Una nueche de reivindicación política, de música y, sobre too, una gran cita pa desplicar a lxs asistentes en qué consiste el proyectu d’IA y sumar apoyos en forma de firmes o collaboración.

Sabemos qu’hai milenta opciones de corte anticapitalista pero nós, quienes formamos parte de los Comités d’apoyu a IA, escoyimos ésta. Porque, como diz Daniel Bensaïd, “si nun intentamos cambiar el mundu… aplastarános”.

El pasau sábadu 28 de febreru presentóse y constituyóse formalmente el Comité d’apoyu a la candidatura d’IA n’Asturies. Na presentación d’Uviéu a la qu’asistieron una veintena de militantes d’estremaos colectivos y movimientos sociales asturianos intervino a manera d’introducción Tania González, miembru del comité d’apoyu que fizo un pequeñu balance de les lluches actives n’Asturies asina como un recordatoriu de movilizaciones como la fuelga contra Bolonia, la movilización en defensa de los puestos de trabayu y contra la crisis, el día de les muyeres, etc. 

Dempués tomó la palabra Miguel Urbán, miembru de la secretaría confederal d’IA, que fizo una esposición del porqué d’esta candidatura asina como de los plantegamientos d’Izquierda Anticapitalista, qu’abrió un debate colos asistentes alrodiu cuestiones como la construcción europea, el procesu de constitución d’IA como partíu o el futuru de la izquierda radical nel Estáu español y n’Europa.

Pela tarde hebo un actu en Xixón, nel emblemáticu Café Gijón, puntu d’alcuentru y alderique de la izquierda xixonesa, al qu’acudieron una treintena de persones y que cola mesma estructura que l’actu d’Uviéu sirvió p’abrir debates ya intercambios de postures de cara a la cita electoral de xunu.

Quedaron asna constituyíos públicamente los primeros comités d’apoyu n’Asturies, qu’esperamos nun seyan los únicos, nos que mos aglutinamos militantes y activistes asturianos que nun solo creyemos qu’otru mundu y otra Europa ye posible, sinón necesaria.

La organización Izquierda Anticapitalista, nel so últimu congresu decidió presentase a les Elecciones Europees del prósimu mes de xunu.

Pa ello y asina poder garantizar el derechu democráticu a presentáse, necesita presentar nel Conseyu Electoral y ante notariu 15000 firmes de persones con derechu a votu de tol Estáu.

En dellos sitios yá ta en marcha la campaña y la fórmla que ufiertan ellí onde nun esiste la organización ye la de la creación de Comités d’apoyu.

Poro, dende Asturies y pa contribuyir a algamar esa cifra, delles persones creamos un Comité d’Apoyu que vamos presentar públicamente esti sábadu 28 de febreru. Por otru lláu, animámosvos tamién a participar n’el y na posterior campaña de pañada de firmes a toles persones que teáis interesáes.

ACTU PRESENTACIÓN DEL COMITÉ d’APOYU n’ASTURIES, Sábadu 28 de Febreru a les 12:00h na Cai Víctor Chávarri, númberu 19, baxu-15, Uviéu.

Intervién:

• Tania González, miembru del Comité d’Apoyu
• Miguel Urbán, miembru de Izquierda Anticapitalista (Madrid)
• Gael Quirante, miembru de la dirección nacional del NPA (Francia)

Asinamesmo, pola tarde nel Café Gijón a les 17:00h va cellebrase un actu nel que van tar presentes les dos persones enantes mencionáes.

El prósimu sábadu 7 de marzu va celebrase un conciertu en sofitu al comité d’apoyu a la candidatura d’Izquierda Anticapitalista nes elecciones europees. El conciertu va facese na Casa Sindical de Xixón y entamará a les 20:30 hores. La entrada ye de 8 euros y nel conciertu va haber un chigre con precios populares.

Los grupos que van tocar van ser:

Helios. Cantautor afincau n’Asturies que fai un estilu mui particular de música qu’él mesmu denomina canciu d’autor psycodelic. Podeis sintir dalgun cantar suyu equí y, tamién, nel so espaciu: www.myspace.com/heliosruiz

Misiva. Un grupu de punkrock bastante nuevu y que dende Grau mos ufierta cantares n’asturianu asina como un alegatu d’activismu y conciencia. El so espaciu ye: www.myspace.com/misivapunkrock

Fe de Ratas. Finalmente un grupu del que nun fai falta presentación y que dende Avilés mos traen el so nueu discu “Antiimperialista”, asina como ser esta la so única fecha de la xira de presentación n’Asturies. Podeis siguilos na so web (www.federatas.com.es) asina como nel so myspace: www.myspace.com/federatasoficial